NINAsoulsiREIGNS: SNN

Kaninang umaga, tumuloy na ang Soul Siren na si Nina sa Regional Trial Court para personal na ihapag ang estafa case na isinasampa niya laban sa dati niyang boyfriend na si Nyoy Volante. Sinuong na raw ni Nina ang final resort na ito dahil hanggang ngayon ay wala pa rin silang confirmation na may balak magbayad sa kanya si Nyoy at ang pamilya niya. Nasa 1.1 million pa raw ang halaga ng utang ng pamilya ni Nyoy kay Nina, at wala siyang balak palampasin ito dahil para sa kanya ay hard-earned money ang perang ito.

Pagbabayad lamang daw nila ang pinaka resolusyon ng problemang ito. Ayon nga sa kanya, hindi naman niya ginusto na humantong sa sampahan ng kaso ang sitwasyon nila. Katulad nga raw ng naunang plano, sa pagitan ng usapan ng mga ina nila ay maaaring maayos na ang problema; ngunit, nang nag-umpisa nang magkagulo at pinutol na ng mga ito ang komunikasyon sa pagitan nila, wala na silang ibang choice kundi idaan sa husgado ang lahat para mapilitan silang makipag-ugnayan sa kanila.

Ang ikinasama pa ng loob ng dalaga patungkol sa sitwasyong kinapapalooban nila ni Nyoy ay ang tila hindi magandang relasyon sa pagitan nila ngayon. Matapos raw kasi ang interview ni Nyoy na inere sa SNN noong April 22, na siya ring sinundan ng panig ni Nina na sa ‘di sinasadyang bahagyang sumalungat sa sinabi niya, nag-iwan raw si Nyoy ng hindi nakakatuwang mensahe sa Facebook account ni Nina. Tila hindi niya ikinatuwa ang naging resulta ng nasabing balita. Sa nasabing mensahe, naglabas raw ito ng sama ng loob laban sa kanya. Base sa mensahe nito sa kanya, iginigiit nito na sana’y nakipag-usap muna ito sa kanya bago naghapag ng ganoong klaseng panayam. “I am not the one who needs an explanation,” reaksyon naman ng dalaga sa hindi inasahang mensahe. Para sa kanya, pinaunlakan lamang niya ang nasabing interview para kahit papaano’y maiparating sa kanya ang pakiusap nito na magbayad na siya para sana hindi na humantong sa sitwasyon ngayon. Ang inaasahan na lang ni Nina sa kasalukuyan ay makipag-usap na ang abugado nila Nyoy sa abugado nila para tuluyan nang matapos ang kaso.

source: abs-cbn.com

Wednesday, April 22, 2009

SNN (ABS CBN 2) FOLLOW UP INTERVIEW ON NINA VS HER EX BF - APRIL 22, 2009

on SNN (ABS CBN 2)

Nina is still hoping that Nyoy Volante will settle his debt
source : abs-cbn.com

by Heidi Anicete

Dalawang buwan na ang lumipas matapos pumutok ang isang mainit na isyu sa pagitan ng dating magkasintahang Nina at Nyoy Volante. Nauwi sa demandahan ang dalawa matapos ‘di umano ang hindi pagbabayad ni Nyoy ng malaking halagang inutang niya noon kay Nina.

Sa isang panayam para sa SNN, inamin ni Nyoy na hindi pa sila nakakapag-uusap ng dating girlfriend simula nang pumutok ang nasabing isyu. Patungkol naman sa isinampang kaso ng estafa sa kanya ni Nina, sinabi niyang maayos naman daw ang takbo nito. Ginagawan na raw nila ng paraan para masettle ang pagkakautang ng kanilang pamilya. “Unti-unti na naming inaayos” sagot niya.

Pinatotohanan rin ni Nina sa isang hiwalay na interview ang hindi niya pakikipag-usap kay Nyoy. Ngunit taliwas sa sinabi ni Nyoy na pakikipag-ayos, nabanggit ni Nina na tila raw hindi nakikipagcooperate ang kabilang panig sa nasabing kaso. Sa katotohanan raw ay hindi pa nga nito napipirmahan ang inihain niyang demand letter. Pero kahit ganito pa man daw ang sitwasyon, hindi pa rin nawawalan ng loob si Nina na babayaran ni Nyoy ang pagkakautang nito sa kanya. As long as may hawak raw siyang mga ebidensya, umaasa pa rin siyang maibabalik sa kanya ang perang pinaghirapan niya at pinahiram sa dating boyfriend.